தீவாளி வருஷங்கள்….!

தைபொங்கல், புது வருஷப்பிறப்பு போன கையோட தீபாவளி எப்ப வருகுது எண்டு, அப்பாவின்ர கட்டிலுக்கு அங்கால இருக்கிற மெய்கண்டான் கலண்டரின்ர திகதித் துண்டுகளை விரித்து எண்ணத் தொடங்கி விடுவேன். தீபாவளிக்கான நாள் நெருங்க நெருங்க, பாரதிராஜாவின்ர பாட்டுக்களில வாற வெள்ளை உடை அக்காமார் ஸ்லோமோஷனில் வருமாப் போல நானும் அந்தரத்தில பறப்பேன்.

அப்பாவுக்கு இந்தக் காலத்து நாகரீகம் தெரியாது எண்டு என்ர அண்ணனுக்கு அப்பா எடுக்கும் துணி வகை பிடிக்காது. ரண்டு, மூண்டு கிழமைக்கு முந்தியே சித்தப்பாவைக் கொண்டு ரவுணிலை சேர்ட்டுத் துணியையும், காற்சட்டைத் துணியையும் எடுத்து விடுவோம். இணுவில் கந்தசுவாமிகோயிலடி வெங்காயச் சங்கத்துக்கு முன்னாலை இரு முஸ்லீம் ரெய்லர் கடை இருந்தது. அம்மா ரீச்சர் எண்டதாலபள்ளிக்கூடம் போற வழியில இருக்கிற அந்த ரெய்லரிட்டைத் தான் எப்பவும் சட்டை தைக்கக் குடுப்பம்.
“ரீச்சர்! தீபாவளி வருது தானே, நிறையச் சோலி இருக்கும், கொஞ்சம் சீக்கிரமாவே துணியைக் குடுத்திடுங்க” எண்டு அம்மா பள்ளிக்கூடம் போற நேரம் கடைக்குள்ளால எட்டிப்பார்த்து நினைப்பூட்டி விடுவார் ரெய்லர். துணிக்கு அளவெடுக்கிற போது ரெயிலர் மீற்றர் பட்டியை வைத்து கொலருக்கும், கையுக்கும் எண்டு அளவெடுத்து விட்டுக் என்ர காற்சட்டைக்கு அளவெடுக்கிற நேரம் பார்த்து
“ரெய்லர்! கொஞ்சம் கால் நீட்டா விட்டுத் தையுங்கோ, கன காலம் வச்சுப் போடலாம்” எண்டு அம்மா கட்டளை இடவும் , பல்லால் நெருவிக்கொண்டே அம்மாவை ஒரு முறை முறைப்பேன்.

தீவாளிக்கு உடுப்புத் தாறது வீட்டுக்காரர் மட்டுமில்லை, சித்தப்பாவின் முறையும் இருக்கு. சித்தப்பாவோட யாழ்ப்பாணம் ரவுணுக்குப் போய் உடுப்பெடுக்கிறதெண்டால் பெரிய புழுகம் தான். அதுக்கும் ரண்டு காரணம். ஒண்டு அவரின்ர பஜாஜ் ஸ்கூட்டரிலை போகலாம். இன்னொண்டு, ரவுணையும் பார்த்து விட்டு வரலாம்.


தீவாளித் தினத்துக்கு கொஞ்ச நாள் முன்னமே யாழ்ப்பாணம் ரவுண் புதுமாப்பிளை போல நல்ல சந்தோசமா இருக்கும். பஸ்ராண்டுக்கு நடுவில இருக்கிற மணிக்குரல் விளம்பர சேவையில் , நிமிடத்துக்கொரு புடவைக்கடை விளம்பரம் வரும். கொடி பறக்குது படத்திலை இருந்து “சேலை கட்டும் பூவுக்கொரு வாசமுண்டு” பாட்டோட சீமாட்டி ஜவுளி மாளிகை விளம்பரம் வரும். கொடி பறக்குது, ராஜாதி ராஜா சேலைகளும், நதியா சுரிதாரும் விளம்பரங்களில் கட்டாயம் இடம்பிடிக்கும்.

புடவைக் கடைத் தட்டிகளில் அமலாவும், அம்பிகாவும் சாறி கட்டினபடி சிரித்துக் கொண்டிருப்பதை ஆவெண்டு பாத்துகொண்டு சித்தப்பாவின் கையைப் பிடிச்சுக் கொண்டே சனத்திரளுக்குள்ளால நகர்வேன். சித்தப்பாவின் கால் சொல்லிவைத்தது போல் நியூமார்க்கட்டுக்குள்ளை இருக்கிற ஹப்பி ரெக்ஸ் கடைக்குத் தான் போகும். ஊர்க்காரற்றை கடை, ஏமாத்த மாட்டாங்கள் என்று நியாயம் கற்பிப்பார். ஹப்பி ரெக்ஸ் இல் சிங்கப்பூரால வந்த சேர்ட்டுக்கள் குவிஞ்சிருக்கும். எனக்கு டிராகன் படமும் பூவும் போட்ட சிங்கப்பூர் சேர்ட்டை சித்தப்பா வாங்கித் தரவேணும் எண்டு கெதியா கண்ணை மூடி ஒருக்கால் பிள்ளையாரை வேண்டிக் கொள்வேன். பெரும்பாலும் பிள்ளையார் வரம் குடுத்து விடுவார். அங்காலை ரியூசனுக்குப் போறதெண்டு சொல்லிப் போட்டு லுமாலாவிலை பஞ்சாபி சட்டை வாங்க வந்த அக்காமாரின் பேரம் பேசலும் மும்முரமாயிருக்கும்.



வசதி குறைந்தவர்களின் அல்லது ஏழைகளின் சொர்க்கமாக பேவ்மென்ற் பாதையோரக் கடைக்காரகளின் விற்பனை இருக்கும்.

புதுச்சட்டை எல்லாம் றெடி எண்டவுடனை, அம்மா பத்திரமாக அவற்றைச் சாமி அறையில இருக்கிற அலுமாரிக்குள்ளை வச்சுப் பூட்டிப் போடுவா. சத்தம் போடாமல், அம்மாவுக்குத் தெரியாமல் சாமியறை அலுமாரியைத் திறந்து மடிச்சு வச்சிருக்கிற சேர்ட்டை ஆசையோடு தடவி விட்டு ஒருக்கால் மணந்து பார்த்தால் வாசனைக்குப் போட்டு வச்ச பூச்சி முட்டை மணமும், புதுச் சட்டையின் வாசமும் கலந்த கலவையான மணம் நாசிக்குள் நிறைக்கும்.

எப்படா விடியும் எண்டு காத்திருந்த தீவாளி நாள் வரும்.

கே.கே.எஸ் றோட்டில, தாவடிசந்தி தாண்டிக் கொக்குவில் பக்கம் போகேக்கை ஒரு மதகு வரும். அந்த மதகுக்குப் பாலம் போட்டு அங்கால் காணியில் ஒரு இறைச்சிக் கடை இருந்தது. வழக்கமா இரண்டு முழு ஆடு தோல் உரிக்கப்பட்டுக் கட்டித் தொங்க விடப்பட்டிருக்கும். கே.கே.எஸ் றோட்டில ஆராவது இறச்சிக்கடைக்காரனுக்குத் தெரிஞ்ச வாடிக்கையாளர் போகேக்கை எட்டி
” அண்ணோய்! ஆட்டிறச்சி ஒரு ரண்டு கிலோ கட்டி வைய்யுங்கோ” என்று கட்டளை இட்டு விட்டுத் தம் வேலையைப் பார்க்கப் போயிடுவினம். மத்தியானம் வரைக்கும் போணியாகாத ஆட்டிறச்சியை எப்படியாவது ஒப்பேற்றி விற்று விடவேணும் எண்ட முனைப்பே இறைச்சிக்கடைக்காரனுக்கு இருக்கும்.

ஆனால் தீவாளி நாளில உதெல்லாம் நடவாது கண்டியளோ, காலமை ஆறு மணிக்கே மதகையும் தாண்டி தீவாளிக்கு இறைச்சி வாங்கவென ஒரு பெருங்கூட்டம் முண்டியடிக்கும்.
“எல்லாரும் வரிசையில நிண்டால் தான் இறைச்சி கிடைக்கும்” என்று புதுப்பணக்காரன் தோரணையில் இறைச்சிக்கடைக்காரன் மிதப்பான்.காலை எட்டுமணிக்கெல்லாம் முழு இறைச்சியும் விற்றுத் தீர்ந்து விடும்.

காலமையே முத்துலிங்க மாமாவின் உதவியில் எங்கட வீட்டுச் சாப்பாட்டுக்கான இறைச்சி வாங்கப்பட்டிருக்கும். சில ஆட்கள் ஒரு ஆட்டை வாங்கி உரித்து சொந்தக்காரருக்குள்ளையே பங்கு ஆடு இறைச்சி பிரிப்பதும் உண்டு. பனையோலையை வளைத்துச் செய்த பாத்திரத்தில் ஒவ்வொரு வீட்டுக்காரருக்கும் தேவையான இறைச்சி பங்கிடப்படும்.


வெள்ளணக் கிணத்தடிப் பக்கம் போய் துலாவில் நீரிறைத்துக் குளியல் போராட்டத்தை நடத்தி முடித்து விட்டு, பிள்ளையாரடிக்கு ஆறரைப் பூசை பார்க்கக் கிளம்புவோம்.

மடத்துவாசல் பிள்ளையாருக்கும் தீபாவளி நாள் தான் நிறையப் பட்டுத் துணிகள் கிடைக்கும். பூசை முடிந்து, கடைசியில சண்டேஸ்வரர் சுவாமியைக் கும்பிடேக்கை, புதுச் சட்டையில் இருந்து ஒரு நூலைப் பவ்யமாக இழுத்தெடுத்து, அந்த நூலைச் சண்டேஸ்வரருக்குச் சார்த்தி விட்டுக் கிளம்புவோம்.

நாலைஞ்சு சொந்தக்காரர் வீட்டுக்குப் போய் புதுச்சட்டையைக் காட்டி விட்டு, அவையள் தாற முறுக்கு, பயற்றம் உருண்டை, அரியதரம் எல்லாத்தையும் சாப்பிட்டுட்டு பால் தேத்தண்ணி வாயுக்குள்ள இருக்கவே அடுத்த வீட்டுக்குப் பாய்வம். சொந்தக்காரர் வீடுகளுக்கு நடைராஜாவிலேயே பயணம் எண்டதால அவையள் தாற பலகாரச் சாப்பாடெல்லாம் பாதிவழியிலேயே செமிச்சுப் போயிடும். எல்லா வீடுகளுக்கும் ஒரு றவுண்ட் அடிச்சுப் போட்டு வீட்டை வர பகல் பன்னிரண்டை தாண்டி விடும்.

வீட்டுக்கு வரும் வழி நெடுகிலும் கடைக்கதவுகளில் பூட்டுக்கள் சிரித்துக் கொண்டிருக்கும். உள் ஒழுங்கைகளுக்காள் வரும் போது ஏற்கனவே மெண்டிஸ் சாராயவகையறாக்களை ஒரு கைபார்த்து விட்ட வயதான மது போதை மன்னர்கள் சிலர் ரோட்டோரமாகவோ, அல்லது கிடுகு வேலிகளின் கதியால் பக்கமாகவோ போதை தலைக்கேறிச் சுருண்டு படுத்திருப்பார்கள்.
“ஒளுதரும் என்னை ஒந்தும் கேட்கப் பிடாது” என்று பஞ்ச் டயலாக் வேற அவர்கள் வாயிலிருந்து அடிக்கடி வரும். ஊர்நாய்களோ, ” மரியாதையா இந்த இடத்தை விட்டுப் போறியோ இல்லையோ?” என்ற தோரணையில் வாள் வாளென்று குரைப்பெடுத்துத் தர்ணாப் போராட்டம் நடத்திக் கொண்டிருக்கும். எல்லாவற்றையும் புதினமாகப் பார்த்துச் சிரித்துக் கொண்டே அவ்விடத்தை விட்டு நகர்வோம்.

வீட்டுக்குள் நுளையும் போது ஆரோ ஆக்கள் எங்கட வீட்டுக்குப் பலகாரம் சாப்பிட வந்திருப்பினம். “எட! சோக்கான சட்டையடா” எண்டு ஒருக்கால் சீண்டிப் பார்ப்பினம். மாப்பிளை பார்க்க வந்த பொம்பிளை மாதிரி வெக்கத்திலை கீழை குனிஞ்சு கொண்டே குசினிப்பக்கம் போயிடுவன். அடுப்படியில் இருக்கும் கறிச்சட்டியை மெல்லமாத் திறந்து பார்த்தால் காலையில் பச்சையாக இருந்த ஆட்டிறச்சி கறிச்சட்டிக்குள்ளை பொன்னிறத்தில நல்லா வதக்கிக் காய்ச்சியிருக்கும். இறைச்சிக்குப் போட்ட மசாலா நொடி வயிற்றில் அமிலத்தைச் சுரக்க வைத்து விடும். வீட்டுக்கு வந்த விருந்தாளிகளை வழியனுப்பி விட்டு, அம்மா நேராகக் குசினிக்குள் வந்து விடுவா. அப்பாவுக்கும் சாப்பாட்டு நேரம் எண்டு விளங்கி விடும். குசினிக்குள்ள இருக்கிற பலகைக் கட்டையில் இருந்து அம்மா, கோப்பையில் போடும் குத்தரிசிச் சோறையும் எண்ணையாகத் திரண்ட கொழுப்பு ஆட்டம் போடும் ஆட்டிறச்சியைக் கலந்து வாயுக்குள்ளை திணித்தால் தேவாமிர்தம் தான்.

எங்கட நாட்டிலை தீபாவளி எண்டால் வெடிகளோ மத்தப்போ இல்லாத நாள் அது. தைப்பொங்கலுக்குத் தான் வெடி, மத்தாப்பு, பூந்திரி எல்லாம் இருக்கும். தீபாவளியை பற்றிப் பத்து வசனம் எழுதுங்கோ எண்டு சொன்னால், புதுச்சட்டை போடுவம், பலகாரம் தின்னுவம், ஆட்டிறைச்சியை மூக்குப் பிடிக்க வெட்டுவம், இவை தான் முதலில் வரும். பிறகு தான் நரகாசுரனின் கதை எல்லாம்.

கொஞ்சம் வளர்ந்து விடலைப் பருவம் வந்தவுடன் நாங்களாகவே தீபாவளி உடுப்பு எடுக்க வேண்டிய பொறுப்பு வந்துவிடும். அப்பா தந்த காசில் உடுப்பு வாங்கவேண்டியது எங்கட பொறுப்பு. அந்த நாளிலை ரவுணுக்குப் போய் ஜீன்ஸ் துணி எடுத்து விட்டு, யார் நல்ல ஸ்ரைலாகத் தைப்பார்கள் எண்டு தேடுவதிலேயே பாதி உயிர் போய் விடும். நியூமார்க்கற் பேவ்மென்றையும் தாண்டிக் கொஞ்சம் சந்துக்குள்ளால் நடந்தால் முஸ்லீம் ரெய்லர்மார் நிறையப் பேர் இருப்பினம். எடுத்த ஜீன்ஸ் துணியில் எங்களுக்குப் பிடித்த விஷயத்தைக் கோடிட்டுக் காட்டினால் போதும் அவை ரோடே போட்டு விடுவினம். ஜீன்ஸ் இன் இரண்டு பொக்கற்றின் பக்கமும் விதவிதமான Pattern இல் சப்பறத்துக்குச் சோடிச்ச மாதிரி நூல் அலங்காரமும் டிசைனும் இருக்கும். காதலன் படத்திலை நீக்ரோ மாதிரி புதுசா நடிக்கவந்த பிரபுதேவா எண்டு ஆரோ கதாநாயகன் போட்ட மாதிரி தொள தொளவெண்டு ஜீன்ஸ் தச்சால் தான் பயோ (bioscience ) படிக்கிற பெட்டையளும், சுண்டுக்குளி வேம்படிப் பெட்டையளும் பார்ப்பினமாம். கட்டுப்பெட்டித் தனமா உடுப்புப் போட்டால் தமிழ்க்கலைவன் பாடசாலையும் ஏறெடுத்துப் பார்க்காது.

வெலிங்டன் தியேட்டருக்கு முன்னால “விக்ரம் ரெய்லர்” எண்டு ஒரு ஆள் கடை வச்சிருந்தவர். தொண்ணூறுகளில் அவர் தான் தனிக்காட்டு ராசா. கொஞ்சக் காலம் பின்னால் அந்தக் கடையைக் காணவில்லை.

“எடேய்! இப்பதான்ரா உன்ர ஆள் கோயிலுக்கு வந்து போட்டுப் போகுது” கோயிலுக்கு வரும் போதே ஏஷியா சைக்கிளில் ஊன்றி கொண்டிருக்கும் நண்பன் சொல்லவும், பிள்ளையாரைப் பிறகு பார்க்கலாம் எண்டு மனசு சமாதானப்படுத்த வந்த வழியே திரும்பிச்
சைக்கிள் வலிக்க, சுரிதார் அணிந்து லுமாலாவில் பறந்த கிளியைத் தேடிப் பறக்கும், அதுவரை அவ்ரோ பிளேன் கணக்காய் ஓடிய ஏஷியா அவளின் சைக்கிளை அண்மித்ததும் வேகம் தணிந்து கடைக்கண்ணால் ஏறெடுத்து அந்தப் புதுச்சட்டைக்கே பெருமை சேர்த்த பெருமாட்டியைப் பார்த்து முத்திப் பேறடையும் கணம், லுமாலாச் சைக்கிளே வெக்கத்தில் சிரிக்கும்.

தீவாளி வருஷங்களில் புதைந்த நினைவுகள் கலைய, எல்லாம் தொலைத்து எங்கோ தொலைவில் இருந்து கொண்டு , அந்த நாள் வாழ்வும் வந்திடாதோ என்று உலகப் படத்தில் சின்னப் புள்ளியாய் இருக்கும் இலங்கை போல் நம்பிக்கையின் எச்சம் மட்டும் எஞ்சி நிற்கின்றது.

படங்கள்: 2006 இல் எடுக்கப்பட்டவை

28 thoughts on “தீவாளி வருஷங்கள்….!”

  1. தீபாவளி வாழ்த்துக்கள்..
    ஊரு தீபாவளி எப்படி இருக்கும்ன்னு நல்லா சொல்லிட்டீங்க..கடைசியில் வச்சீங்க பாருங்க மிச்சமிருக்கும் ஆசைன்னு ம்.. 🙁 என்ன சொல்ல…

  2. //பாரதிய நவீன இளவரசன் said…
    vetri nichchayam! the golden days are sure to come again… உங்களுக்க்கும் உங்கள் குடும்பத்தாருக்கும் என் இனிய தீபாவளித் திருநாள் நல்வாழ்த்துக்கள்!//

    பாரதீய நவீன இளவரசரே

    யுத்தம் என்னும் நச்சு விதை பூக்காத தாய்நாடு மலரவேண்டும், அங்கு மீண்டும் புதிதாய்ப் பிறக்கவேண்டும்.

    உங்களுக்கும் உங்கள் குடும்பத்தாருக்கும் என் இனிய மனம் நிறைந்த தீபாவளி வாழ்த்துக்கள்.

  3. ஒரு சில கடைகளின் பெயர்களைத்தெரியவில்லையே தவிர மற்றும்படி நாங்கள் கொண்டாடிய தீபாவளியும் அன்று நீங்கள் எழுதியதைப்போலத்தானிருந்தது.

    தீபாவளி கொண்டாட கொடுத்து வைத்தவர்களுக்கு வாழ்த்துக்கள்.

  4. //முத்துலெட்சுமி said…
    தீபாவளி வாழ்த்துக்கள்..
    ஊரு தீபாவளி எப்படி இருக்கும்ன்னு நல்லா சொல்லிட்டீங்க..கடைசியில் வச்சீங்க பாருங்க மிச்சமிருக்கும் ஆசைன்னு ம்.. 🙁 என்ன சொல்ல…//

    வாங்க முத்துலெட்சுமி

    சொர்க்கமே என்றாலும் அது நம்மூரப்போல வருமா?

    உங்களுக்கும் இனிய நல் தீபாவளி வாழ்த்துக்கள்

  5. //theevu said…
    ஒரு சில கடைகளின் பெயர்களைத்தெரியவில்லையே தவிர மற்றும்படி நாங்கள் கொண்டாடிய தீபாவளியும் அன்று நீங்கள் எழுதியதைப்போலத்தானிருந்தது.

    தீபாவளி கொண்டாட கொடுத்து வைத்தவர்களுக்கு வாழ்த்துக்கள்.//

    வாங்கோ தீவண்ணை

    இப்படியான நினைவுகள் பெரும்பாலும் எல்லாருக்கும் ஒத்துவரும் இல்லையா.

    கடந்த வாரம் நிகழ்ந்த அனர்த்தங்களும் தொடர்ச்சியான போரின்னல்களும் இம்முறைத் தீபாவளியையும் சுரத்தில்லாமல் செய்து விட்டது, என்ன செய்வது.

  6. //செந்தில் குமார் இராமச்சந்திரன் / Senthil Kumar Ramachandran said…
    உங்கள் கனவுகள் நனவாகட்டும்; அந்த இனிய நாட்கள் விரைவில் கிட்டட்டும்//

    மிக்க நன்றி சகோதரனே

  7. தல,
    தீபாவளியப் பத்தி அற்புதமா பதிஞ்சிருக்கீங்க… ஈழத்து தீபாவளி எப்படியிருக்கும் என்று உங்களக் கேக்கனுமின்னு நெனச்சேன். நீங்களே அத மிக அருமையா பதிவு செஞ்சுட்டீங்க. உங்க ஊரு மொழி நடைப்பிரயோகம் நல்லா இருக்கு. எடேய், அண்ணாச்சி போன்ற சொற்கள் நம்ம ஊர்லயும் ப்ரவலாக பேசப்படும் சொற்கள்.

    ரெடிமேட் சட்டைகள் பிரபலமில்லாத அந்த நாட்களில், தையல்காரரிடம் போய் ரஜினி கமல் படங்களைக் காட்டி அது மாதிரி வேணுமின்னு கேட்டது ஞாபகம் வந்தது.

    ஈழத்து மக்கள் முன்னாடி மாதிரி தீபாவளி கொண்டாடுத நாள் சீக்கிரம் வரும்.

  8. வாங்க தல

    தீபாவளி தான் கொண்டாடமுடியல, அந்த நினைவுகளாவது நிம்மதி தரட்டுமே.

    நெல்லைச் சீமைக்கு வரணும், நம்ம பண்பாடு,பழக்க வழக்கங்கள் குறித்த ஒற்றுமை எப்படி இருக்கிறதென்று கண்ணாரக் காண வேண்டும்.

  9. தல உங்களுக்கும் உங்கள் குடும்த்தினார் அனைவருக்கும் இனிய தீபாவளி வாழ்த்துக்கள் :))

    பதிவை படித்தவுடன் உங்க கூட சேர்ந்து நானும் தீபாவளி கொண்டாடியா உணர்வு வந்துடுச்சி தல 🙂

    அட்டகாசமான எழுத்து நடை..பின்னிட்டிங்க 🙂

    \”ரெய்லர்! கொஞ்சம் கால் நீட்டா விட்டுத் தையுங்கோ, கன காலம் வச்சுப் போடலாம்” எண்டு அம்மா கட்டளை இடவும் , பல்லால் நெருவிக்கொண்டே அம்மாவை ஒரு முறை முறைப்பேன்\

    அங்கையும் இப்படி தானா! :)) மிக்க மகிழ்ச்சி 🙂

    நம் கனவுகள் அனைத்தும் விரைவில் நினைவாகும்…வாழ்த்துக்கள் 🙂

  10. தொள தொளவெண்டு ஜீன்ஸ் தச்சால் தான் பயோ (bioscience ) படிக்கிற பெட்டையளும், சுண்டுக்குளி வேம்படிப் பெட்டையளும் பார்ப்பினமாம். கட்டுப்பெட்டித் தனமா உடுப்புப் போட்டால் தமிழ்க்கலைவன் பாடசாலையும் ஏறெடுத்துப் பார்க்காது. சூப்பர் =D>

    அம்மா, கோப்பையில் போடும் சிவப்பரிசிச் சோறையும் எண்ணையாகத் திரண்ட கொழுப்பு ஆட்டம் போடும் ஆட்டிறச்சியைக் கலந்து வாயுக்குள்ளை திணித்தால் தேவாமிர்தம் தான். இப்படியெல்லாம் இனி நடக்குமா :-/

  11. //கோபிநாத் said…

    பதிவை படித்தவுடன் உங்க கூட சேர்ந்து நானும் தீபாவளி கொண்டாடியா உணர்வு வந்துடுச்சி தல :)//

    வாங்க தல

    பழைய நினைவுகளைப் பேசவும் எழுதவும் சுகமானவை. உங்களுக்கும் காலம் கடந்த தீபாவளி வாழ்த்துக்கள், மிக்க நன்றி

  12. நெஞ்சு கனக்கும் நினைவுகளை மீட்டி விட்டீர்கள் தீபாவளி ஒரு மாதம் முதலே எண்ணத்தொடங்கும் ஈழத்துத் தீபாவளியும்

    தீபாவளி வாழ்த்து ஈழத்திலிருந்து சொன்ன போதுதான் இன்றோ தீபாவளி என எண்ணி இதயம் கரைந்த புலம் பெயர் தீபாவளி

  13. இனிய தீபாவளி வாழ்த்துகள் பிரபா.

    தீபாவளி என்றால் கறியெடுப்பது எங்கள் பக்கத்தில் மட்டும் பழக்கம் என்று நினைத்தேன். உங்கள் பக்கத்திலுமா.

    ஒரு நண்பர் கேட்டார். தீபாவளிக்கு ஒங்க வீட்டுல நோன்பு உண்டா என்று. எங்க வீட்டுல கறியெடுத்துக் கொழம்பு வெக்கிறதுதான் நோன்புன்னு சொன்னேன். 🙂

    அரியதரம்னா அதிரசம். நாங்க சின்னப்பிள்ளைல..எங்க பட்டிக்காட்டுல தீபாவளின்னா அதிரசம் மலை மாதிரி கெடக்கும். எங்க வீடு பெரிய வீடு. பெரிய அடுப்படி. ஆகையால நாலஞ்சு அடுப்பு வெச்சி சொந்தக்காரப் பெண்மணிகள் எல்லாம் வந்து உக்காந்து அதிரசத்தைப் பக்குவமாப் பொரிப்பாங்க. அந்த அதிரச ஸ்பெஷலிஸ்டுகள் இப்ப அதிரசத்தையே மறந்து போயிட்டாங்க. ஆனா சுவை மட்டும் மறக்கலை.

  14. //மாயா said…
    கட்டுப்பெட்டித் தனமா உடுப்புப் போட்டால் தமிழ்க்கலைவன் பாடசாலையும் ஏறெடுத்துப் பார்க்காது. சூப்பர் =D>//

    எல்லாம் ஒரு அனுபவம் தான் தம்பி 😉

    //இப்படியெல்லாம் இனி நடக்குமா :-///

    அந்தப் பொற்காலத்திற்காகத் தான் காத்திருக்கின்றேன்.

  15. //தமிழ்பித்தன் said…
    நெஞ்சு கனக்கும் நினைவுகளை மீட்டி விட்டீர்கள் தீபாவளி ஒரு மாதம் முதலே எண்ணத்தொடங்கும் ஈழத்துத் தீபாவளியும்//

    வாங்கோ தமிழ்ப்பித்தன்

    கடந்த வருசம் வரைக்கும் தாய்நாட்டில் நீங்களும் இருந்ததால் இந்த நினைவுகளில் பல உங்களுக்கு இளமையாக இருக்கும் தானே. வருகைக்கும் கருத்துக்கும் நன்றிகள்.

  16. அடடா மிகவும் ரசித்து எழுதியிருக்கிறீர்கள் ஆனால் நீங்கள் ராஜாதிராஜா பாடல்களையும் நதியாவையும் குறிப்பிட்டுள்ளதால் உங்கள் வயதை ஓரளவு கணிக்கமுடிகின்றது. ( என்ன ஒரு 40 இருக்கும் தானே அண்ணே). நாங்கள் எல்லாம் ரம்பா, மீனா, நக்மா காலத்தில் ஆட்கள். ஆனாலும் இப்போ பிரபா அண்ணனின் அண்ணி( அதாங்க பாவனா) ,அசின் ரசிகர்கள்.

    நாங்க‌ள் தீபாவ‌ளி என்றால் அன்று எப்ப‌டியும் பெரிய‌ ஒரு கிரிக்கெட் மேட்ச் விளையாடுவ‌து. இறைச்சியும் பாணும் தான் ஸ்பெச‌ல். கிரிக்கெட் எல்லாம் இர‌ண்டாம் ப‌ட்ச‌ம்தாம். எப்ப‌டியும் கோயில் எல்லாம் போயிட்டு ஒரு ப‌த்து ப‌த்த‌ரைக்கு மேட்ச் தொட‌ங்கும் 12 ம‌ணிக்கு சாப்பாடு முடின்துவிட்ட‌து என‌ ஒரு த‌க‌வ‌ல் வ‌ர‌ இர‌ண்டு ம‌ணி ம‌ட்டும் சாப்பாடு. கொஞ்ச‌ம் த‌ண்ணி அடிக்கும் பொடியுள் எங்கேயிருன்தாவ‌து க‌ள்ளூ கொண்டுவ‌ன்து குடிப்பார்க‌ள். பிற‌கு இர‌ண்டு ம‌ணிக்கு மேட்ச் மீண்டும் தொட‌ங்கி ஒரு 6 ம‌ணி வ‌ரை விளையாடுவோம், அப்புற‌ம் என்ன‌ குடிம‌க‌ன்க‌ளுக்கு உஷார் ஏறினால் அதிலும் வேண்டப்பட்ட பெண்கள் மேட்ச் பார்க்க‌ வந்தால் ஒரே ஆட்ட‌மும் பாட்டும்தான். அதெல்லாம் ஒரு க‌னாக்கால‌ம். இனி எம‌க்கு வ‌ராது.

  17. //வந்தியத்தேவன் said…
    நீங்கள் ராஜாதிராஜா பாடல்களையும் நதியாவையும் குறிப்பிட்டுள்ளதால் உங்கள் வயதை ஓரளவு கணிக்கமுடிகின்றது. ( என்ன ஒரு 40 இருக்கும் தானே அண்ணே).//

    உங்கள் எல்லாருக்கும் என்ர வயதோட ஒரு சேட்டை என்ன ;-), ராஜாதிராஜா முப்பது வருசத்துக்கு முந்தியே வந்தது?
    அது ராஜா தியேட்டரில 90 ஆம் ஆண்டு வந்தது. அப்ப எனக்கு என்ன வயசெண்டு சொல்லமாட்டன் சரியோ?

    ஒவ்வொரு பண்டிகைகளின் பின்னாலும் எத்தனையோ இப்படியான நினைவுத்தடங்கள் உண்டு. கானல் நீர் போன்ற எம் வாழ்வில் தோன்றி மறைந்த இனிமைப் பொழுதுகள் அவை.

    உங்களின் அனுபவத்தைக் கேட்கவும் சுவாரஸ்யமாக இருந்தது. வருகைக்கு நன்றிகள்.

  18. பிரபா!
    அருமை…
    //ரெய்லர்! கொஞ்சம் கால் நீட்டா விட்டுத் தையுங்கோ, கன காலம் வச்சுப் போடலாம்” எண்டு அம்மா கட்டளை இடவும் //

    இந்த இடத்தில் என் தாயார் வசனம் சற்று மாறுபடும். ஆனால் கருத்து ஒன்றே!!
    அதாவது” வளருர பிள்ளை..விட்டுத்
    தையுங்கோ’..அவர்களுமோ..சொல்லுத் தப்பமாட்டார்கள். பிறகென்ன..பழைய தமிழ்ப்பட பொலிசுக்காரர் கழிசான் தான் நமக்கு..
    என் தாயாரை..இந்த தீபாவளி எழுத்து நினைக்க வைக்கிறது..
    அது போல் இனி வரவே வராது….

  19. //G.Ragavan said…
    இனிய தீபாவளி வாழ்த்துகள் பிரபா.

    தீபாவளி என்றால் கறியெடுப்பது எங்கள் பக்கத்தில் மட்டும் பழக்கம் என்று நினைத்தேன். உங்கள் பக்கத்திலுமா.//

    வாங்க ராகவன்

    நிறைந்த தீபாவளி வாழ்த்துக்கள். உங்கள் பின்னூட்டம் பார்த்துத் தான் தமிழகத்திலும் தீபாவளிக்கு கறிசமைப்பார்கள் என்று அறிந்து கொண்டேன். நிறைய சுவையான தகவல்களைத் தந்திருக்கின்றீர்கள்.

    அதிரசம் – அரியதரம் அருமையான தின்பண்டங்களில் ஒன்று.

    வருகைக்கும் கருத்துக்கும் மிக்க நன்றிகள்.

  20. //யோகன் பாரிஸ்(Johan-Paris) said…
    பிரபா!
    அருமை…

    இந்த இடத்தில் என் தாயார் வசனம் சற்று மாறுபடும். ஆனால் கருத்து ஒன்றே!!
    அதாவது” வளருர பிள்ளை..விட்டுத்
    தையுங்கோ’..அவர்களுமோ..சொல்லுத் தப்பமாட்டார்கள். பிறகென்ன..பழைய தமிழ்ப்பட பொலிசுக்காரர் கழிசான் தான் நமக்கு..
    என் தாயாரை..இந்த தீபாவளி எழுத்து நினைக்க வைக்கிறது..
    அது போல் இனி வரவே வராது….//

    வணக்கம் யோகன் அண்ணா

    அப்பா, அம்மா கூட இருந்தபோது அவர்களின் அருமை தெரியவில்லை. இப்போது திசைக்கொன்றாய் இருக்கின்றோம். இப்படி எழுதியாவது ஆற்றுப்படுத்த வேண்டும்.

    இனிமேல் இப்படியான வாழ்வை நினைத்தும் பார்க்க முடியாது.

    மிக்க நன்றி தங்கள் கருத்துக்கு.

  21. hi, vannakam. I dont like the way u typed theepawali. normally in tamil we type like this. in north india they type as u typed in tamil. nowadays even in tamil nadu ppl type theepawali in english. u have typed exatly in tamil. varalattu thavarai saiyavendam. theepawali enpathu engalin sariya murai ucharippu. melum vada inthiya thepawali vera engara theepawali vera. theepawali endu kurippudungo. neengal thamiluku aatrum pali alapariyathu aanal intha thavaru ennai mika mika nokadithu vittatu. sorry if it hurts u

  22. வணக்கம் வெண்காட்டான்

    தீவாளி என்பது எங்களூர் பேச்சுவழக்கில் தீபாவளியைக் குறிப்பிட நாம் ஊரில் இருந்தபோது பயன்படுத்திய சொற்பிரயோகம். வேறெந்தக் காரணத்திலும் இதை நான் குறிப்பிடவில்லை.

  23. Great..! வேறு என்ன சொல்ல.. 🙂
    பேச்சு வழக்கில் கலக்கியிருக்கிறிங்க கானா பிரபா..
    முன்கூட்டிய தீபாவளி வாழ்த்துக்கள் 2008 க்கு 🙂

  24. கவலை எல்லாம் விட்டுவிட்டு இலக்கியா குட்டிஉடன் இவ்வருட தீபாவளியை மிக்க சந்தோஷத்துடன் கொண்டாடுங்கள்.

Leave a Reply to செந்தில் குமார் இராமச்சந்திரன் / Senthil Kumar Ramachandran Cancel reply

Your email address will not be published. Required fields are marked *